काठमाडाैं । शहीद स्मारक ए डिभिजन लिगअन्तर्गत आजको दोस्रो खेलमा फ्रेन्ड्स क्लबले सरस्वती युथ क्लबमाथि सहज जित निकालेको छ । अखिल नेपाल फुटबल सङ्घ (एन्फा) कम्प्लेक्स सातदोबाटोमा भएको खेलमा फ्रेन्डस्ले सरस्वतीलाई ४–१ गोलले हराएको हो । 

फ्रेन्डस्का लागि उत्तम राईले दुई तथा विदेशी खेलाडी साउलो डी अक्विनो र वाग्नेर डो कार्मोले एक÷एक गोल गरे । सरस्वतीका लागि काजिम एडिमगोके बुसारीले सान्त्वना गोल गरे । खेलको पाँचौँ मिनेटमा फ्रेन्डस्का लागि उत्तम राईले पहिलो गोल गरेका थिए। उनले वाग्नेर डो कार्मोको पासमा गोल गरेका हुन् । खेलको २४औँ मिनेटमा साउलो डी अक्विनोले फ्रिकिकमा फ्रेन्डस्का लागि दोस्रो गोल गरे । खेलको ३०औँ मिनेटमा सरस्वतीका मनिश थापाले गोलपोष्टमा प्रहार गरे पनि फ्रेन्डस्का किपरले रोक्नुभएको थियो । पहिलो हाफमा फ्रेन्डस् २–० गोलको अवस्थामा थियो । 

मध्यान्तरपछिको खेलमा फ्रेन्ड्का सरोज योञ्जन घाइते भएपछि खेल केही समय रोकिएको थियो । खेलको ७०औँ मिनेटमा वाग्नेर डो कार्मोले उत्कृष्ट गोल गर्दै फ्रेन्डस्लाई ३–० को अग्रता दिलाए । खेलको ८०औँ मिनेटमा सरस्वतीका लागि काजिम एडिमगोके बुसारीले सान्त्वना गोल गरे। खेलको ८६औँ मिनेटमा फ्रेन्डस्का उत्तम राईले चौथो गोल गर्दै आफ्नो टोलीलाई सहजै जित दिलाए। खेलको म्यान अफ दी म्याचसमेत उहाँ नै घोषित भए।    

त्रिभुवन आर्मी शीर्ष स्थानमा 

शहीद स्मारक लिगमा हालसम्मको खेल प्रदर्शनअनुसार त्रिभुवन आर्मी क्लब शीर्ष स्थानमा छ । आर्मीले छ खेलमा चारमा जित, एउटामा हार तथा एउटामा बराबरी खेल्दै १३ अङ्क बटुलेको छ । मछिन्द्र क्लब दोस्रो स्थानमा छ । सात खेलमा चारमा जित, दुईमा हार र एउटामा बराबरी खेलेको मछिन्द्रको १३ अङ्क छ । मनाङ मस्र्याङ्दी क्लब सात खेलमा तीनमा जित तथा चार खेलमा बराबरीका साथ १३ अङ्कसहित लिगको तेस्रो स्थानमा छ । सात खेलमध्ये तीनमा जित, दुईमा हार र दुई खेलमा बराबरी खेलेको थ्री स्टार ११ अङ्कसहित चौथो स्थानमा छ । 

यस्तै आज भएको खेलमा जित निकाल्दै न्यूरोड टिमले लिग तालिकामा फड्को मारेको छ । न्यूरोड विभागीय क्लब एपीएफलाई ३–२ गोलले हराएसँगै चार खेलमा जीत तथा एकमा बराबरीका साथ ११ अंकसहित पाँचौँ स्थानमा उक्लेको छ । यसअघि न्यूरोड नवौँ स्थानमा थियो । नेपाल पुलिस क्लब सात खेलमा तीनमा जित, दुईमा हार र दुई खेलमा बराबरीका साथ ११ अङ्कसहित छैटौँ, जाउलाखेल युथ क्लब दुई खेलमा जित, दुईमा हार र तीनमा बराबरी खेल्दै नौ अङ्कका साथ सातौँ तथा सङ्कटा क्लब छ खेलमध्ये दुईमा जित, दुईमा हार र दुईमा बराबरी खेल्दै आठ अङ्कसहित लिगको आठौँ स्थानमा छ । 

यसैगरी फ्रेन्ड्स क्लब सात खेलमध्ये दुईमा जित, तीनमा हार र दुईमा बराबरीका साथ नवौँ, ब्रिगेड ब्वाइज क्लब दुईवटामा जित, तीनमा हार र एकमा बराबरी खेल्दै सात अङ्कसँगै १०औँ, हिमालयन शेर्पा क्लब एक खेलमा जित, दुईमा हार र चार खेलमा बराबरीका साथ ११औँ, च्यासल युथ क्लब एक खेलमा जित, दुईमा हार र तीनमा बराबरी खेल्दै सात अङ्कसहित १२औँ, सशस्त्र प्रहरी बलको एपीएफ क्लब सात खेलमा एउटामा जित, चारमा हार र दुई खेलमा बराबरीका साथ पाँच अङ्कसहित १३औँ तथा सरस्वती युथ क्लब लिगको पुछारमा रहेको छ । सरस्वतीले हालसम्म खेलेको सबै सात खेलमा हार बेहोरेको छ । उसले एउटा खेलमा बराबरी खेल्दै एउटा अङ्क मात्र जोडेको छ ।