Hamro Khabar

नयाँ दिल्लीमा बन्धक १२ नेपाली महिलाको उद्वार

हाम्रोखबर आइतबार, चैत्र १७ २०७५

काठमाडौं । मानव तस्करहरुको गिरोहले भारतको नयाँ दिल्लीमा बन्धक बनाएर राखिएका १२ जना नेपाली महिलाको उद्धार गरिएको छ । खाडीका बिभिन्न मुलुक पठाइदिने भन्दै केही महिनादेखि तस्करहरुले नयाँ दिल्लीको छावला थाना, द्वारकामा बन्धक बनाईएका ती नेपाली महिलाको दिल्ली महिला आयोगको सहयोगमा गएराती उद्धार गरिएको हो ।
सो गिरोहले ८ जनालाई कुतुब बिहार र अन्य चार जनालाई श्याम बिहारमा कोठा भाडामा लिएर राखेको दिल्ली पुलिसले जनाएको छ । दिल्ली महिला आयोग, दिल्ली प्रहरी, नेपाली दूतावास र केआई नेपालको संयुक्त टोलीले गएराति छापा मारेर उनीहरुको उद्धार गरेको हो । उद्धार गरिएका महिलाहरुका अनुसार, केही एक साता अघि र केही दुई महिनादेखि सो स्थानमा बस्दै आएका थिए ।
गिरोहका एक सदस्य उदय रानाले उनीहरुलाई आकर्षक तलब सुविधा पाउने गरी घरेलु कामदारका रुपमा बिभिन्न मुलुक लैजाने भन्दै त्यहाँ पुर्याएको खुलेको छ । उद्धार गरिएका महिलाहरुलाई आवश्यक कानूनी प्रक्रियापछि नेपाल फर्काइने बताइएको छ । गरिएको छ । मुद्दा लगायतका कानूनी प्रक्रिया पूरा भएपछि नेपाल फर्काउने प्रक्रिया सुरु हुने केआई नेपालका दिल्ली प्रतिनिधि नविन सिहंले बताए ।