काठमाडौँ । प्रभु बैंक लि. र गोर्खा सत्याग्रह समिति नेपालबीच प्रभु स्पेशल सेभिङ्ग खाता सञ्चालन सम्झौता भएको छ । ललितपुर महानगरपालिका वडा न. १४ को मानभवनस्थित सरकारको सैनिक सेवामा कार्यरत तथा भुतपुर्व सैनिकहरुको प्रभु स्पेशल सेभिङ्ग खाता सञ्चालन गर्ने सम्बन्धी आज एक समारोहकाबीच सम्झौता भएको हो । सम्झौतामा गोर्खा सत्यग्रह समिति, नेपालका तर्फबाट अध्यक्ष श्री कृष्ण बहादुर राई र प्रभु बैंक लि.का प्रमुख कार्यकारी अधिकृत श्री अशोक शेरचनले हस्ताक्षर गरेका हुन् ।

गोर्खा सत्याग्रह समिति नेपालले प्रभु बैंक लिमिटेडको कमलादी शाखा कार्यलयमा आफनो नाममा खाता खोली कारोबार गर्नेछ र गोर्खा सत्याग्रह समिति नेपालका सदस्यहरुले पनि प्रभु बैंक लि.को जुनसुकै शाखा कार्यलयबाट प्रभु स्पेशल सेभिङ्ग खाता खोल्न सक्ने व्यवस्था मिलाएको छ । गोर्खा सत्याग्रह समिति नेपालका सदस्यहरुले प्रभु बैंकमा प्रभु स्पेशल सेभिङ्ग खाता खोली ब्रिटिश सरकारबाट प्राप्त हुने पेनसन रकम सिधै प्रभु बैंकमा रहेको सम्बन्धित खाताधनीको खातामा जम्मा हुने व्यवस्था मिलाएको छ । 

प्रभु स्पेशल सेभिङ्ग खाता खोल्ने ब्रिटिश सैनिक सेवामा कार्यरत तथा भुतपूर्व ब्रिटिश गोर्खा सैनिकहरुले शुन्य मौज्दातमा यो खाता खोल्न सक्नेछन् । हालको लागि वार्षिक ६.५ प्रतिशत ब्याज प्रदान गरिने उक्त खातामा बैंकको नियमानुसार ब्याजदर परिवर्तन हुन सक्नेछ । युपिआई कार्डको सेवा शुल्क (पहिलो वर्षको लागि मात्र)चेकबुक,एबिबिएस शुल्क , ब्यालेन्स सर्टिफिकेट, गुडफर पेमेन्ट शुल्क, बैंक स्टेटमेन्ट,चेक स्टप शुल्क तथा अनलाइन बैंकिङ्ग दर्ता गर्दा लाग्ने सेवा शुल्क निशुल्क प्राप्त हुनेछ ।

सम्झौता बमोजिम खाता खोल्ने ब्रिटिश सैनिकमा कार्यरत सैनिक तथा भुतपूर्व ब्रिटिश गोर्खा सैनिकहरुले लकर सेवा बापत लाग्ने शुल्क,ड्राफ्ट,ट्राभल कार्ड तथा मोबाइल बैंकिङ्ग उपभोग गरे बापत लाग्ने सेवा शुल्कमा ५० प्रतिशत छुट समेत प्राप्त गर्नेछन् । साथै प्रभु स्पेशल सेभिङ्ग खातामा सम्बन्धित सैनिकको पहिलो पटकको पेनसन जम्मा हुनासाथ सम्बन्धित सैनिकको ६ महिनाको पेनसन रकम बराबर वा रु.५ लाख रुपैयाँ मध्ये जुन कम हुन्छ सो रकमासम्म व्यक्तिगत कर्जा शिर्षक अन्तर्गत विना धितो कर्जा सुविधा गराउने व्यवस्था समेत रहेको छ । यसबाट ब्रिटिश सरकारको सैनिक सेवामा कार्यरत तथा भुतपूर्व ब्रिटिश सैनिकहरुलााई विशेष सुविधा उपलब्ध हुने भएकोले अधिकतम ब्रिटिश सैनिक तथा भुतपूर्व सैनिकहरुले प्रभु बैंकमा प्रभु स्पेशल सेभिङ्ग खाता खोली लााभ उठाउने बैंकको विश्वास रहेको छ । 

गोर्खा सत्याग्रह समिति नेपाल खासगरी ब्रिटिश सरकारको सैनिक सेवामा कार्यरत तथा भुतपुर्व गोर्खा सैनिकहरुको हितमा क्रियाशिल रहेको गैरसरकारी संस्था हो ।