आज संघीय राजधानीबाट प्रकाशित विभिन्न पत्रपत्रिकाले आजबाट काठमाडौंमा सुरु भएको लगानी सम्मेलनबारेको समाचारलाई प्राथमिकता दिएर छापिएको छ । सबै पत्रपत्रिका यस लगानी महाकुम्भको खबरले रंगिएका छन् । कान्तिपुरले लगानी सम्मेलन आजदेखि शिर्षकमा छापेको छ भने नागरिकले सोही समाचार आजबाट लगानी सम्मेलन भनेर छापेको छ । त्यस्तै कारोबार दैनिकले लगानी सम्मेलन आज शिर्षकमा समाचार छापेको छ । भने अन्नपूर्ण पोस्ट्ले लगानी ल्याउन 'कुम्भमेला' शिर्षकमा समाचार छ । 
यसैगरी, प्रदेश सांसदलाई छक्याएर ठगी शिर्षकमा  कान्तिपुर दैनिकमा खबर छ । समाचार अनुसार, कर्णाली प्रदेशसभाका दुई सांसदसँगै अमेरिका लैजाने भन्दै दलालले झण्डै दर्जन व्यक्तिसँग लाखौ रुपैयाँ ठगी गरेको खुलासा भएको छ । सांसदद्वय अमरबहादुर थापा र सीता नेपालीलाई झुक्याएरका दलालहरुले उनीहरुकै नाम बेचेर अन्य व्यक्तिबाट लाखौ रुपैयाँ उठाएका हुन् । 

अन्नपूर्ण पोस्ट्ले भेटियो विश्वकै लामो नुन गुफा शिर्षकमा आकर्षक तस्वीर पहिलो पेजमा छापेको छ । इजरायलको मृत सागर क्षेत्रमा बिहिबार विश्वकै लामो नुन गुफा भेटियोको क्याप्सनमा जनाइएको छ ।  उक्त गुफालाइ मल्हम नामाकरण गरिएको छ । सोडोम पहाडुनिबाट अघि बढेको उक्त गुफा १० किलोमिटर लामो छ  । सन् १९८० बाट खोजी प्रयास भए पनि यतिबेला १० दिन लगाएर वैज्ञानिकहरूले यसलाई भेटाएका हुन् । यो गुफा त्यो क्षेत्रनजिक छ, जहाँ बाइबलमा लोटकी श्रीमती नुनको खम्बामा परिणत भएको भनी देखाइएको समाचार छ ।

नागरिक दैनिकले हामीलाई बाटो खोई ? शीर्षकमा छापिएको समाचारमा अपांगता भएका व्यक्तिहरुले अपांगमैत्री सडक नबनाएको भन्दै काठमाडौंको जोरपाटीस्थित सडकपेटी भत्काएका छन् । अपांगमैत्री सडक संरचना बनाउन माग गर्दै सडकमा उत्रिएका उनीहरुले हातमा गैती, साबेल, घन, छिना बोकेका थिए । उनीहरुले एकाएक सडकपेटी भत्काउन थाले । यो उनीहरुको अपांगमैत्री सडक बनाउन सरकारलाई ध्यानाकर्षण गराउने आन्दोलनको शैली थियो ।

आजको पत्रपत्रिकामा पूर्वराज्यमन्त्री साहसहित ७ लाई जन्मकैद भएको समाचारले पनि प्राथमिमकता पाएको छ । समाचार अनुसार, पाँच जनाको ज्यान जाने गरी ६ वर्षअघि जनकपुरको रामानन्द चोकमा गराइएको बम विस्फोट मुद्दामा जिल्ला अदालत धनुषाले पूर्वराज्यमन्त्री सञ्जय साह (टकला) सहित ७ जनालाई जन्मकैदको फैसला सुनाएको छ । 

त्यस्तै आजको नयाँ पत्रिकाले दलितले पैसा उठाएर, पसिना बगाएर बनाएको मण्डपमा मन्त्रीले महायज्ञ उद्घाटन गरे, पूजा बस्दा दलित लखेटिए शिर्षकमा बाराको समाचार छापेको छ । समाचार अनुसार, बारामा मन्त्रीले उद्घाटन गरेको महायज्ञमा दलित समुदायलाई पूजामा रोक लगाइएको छ । प्रदेश, २ का भौतिक पूर्वाधार विकासमन्त्री जितेन्द्र सोनलले उद्घाटन गरेको उक्त महायज्ञको मण्डप दलितले बनाएका हुन् भने उनीहरुले प्रतिघर एक हजारका दरले चन्दा पनि दिएका थिए ।