Hamro Khabar

पाकिस्तानले भारतविरुद्ध युद्ध सुरु गर्दैन : प्रधानमन्त्री खान

मङ्गलबार, भाद्र १७ २०७६

एजेन्सी । पाकिस्तानका प्रधानमन्त्री इमरान खानले भारतविरुद्ध पाकिस्तानले कहिले पनि युद्ध सुरु नगर्ने बताएका छन् । पाकिस्तानको गर्भनर हाउसमा सोमबार सिख समुदायका मानिसहरुसँगको भेटघाटमा उनले यस्तो बताएका हुन् । प्रधानमन्त्री खानले युद्ध कुनै पनि समस्याको समाधान नभएको भन्दै यसले बरु अझ धेरै खराबीलाई जन्माउने बताए ।

प्रधानमन्त्री खानले युद्ध कुनै पनि समस्याको समाधान नभएको भन्दै यसले बरु अझ धेरै खराबीलाई जन्माउने बताए । उनले भने,‘म भारतलाई के भन्न चाहन्छु भने युद्ध कुनै पनि समस्याको समाधान होइन । युद्धका विजेताले पनि खासमा हारेकै हुन्छ । युद्धले अन्य धेरै खराबीलाई जन्म दिन्छ’ ।

इमरानले आफूलाई भेट्न आएका शिख समुदायका प्रतिनिधिमण्डलसँग भारतका प्रधानमन्त्री नरेन्द्र मोदीसँग भएको टेलिफोन वार्ता पनि स्मरण गरे । उनले भने,‘मैले मोदीलाई पाकिस्तान र भारत दुवैतर्फ समान खाले परिस्थिती रहेको कुरा सम्झाएँ । मैले उनलाई जलवायु परिवर्तनबारे बताए । हामीले जलवायु परिवर्तनको मुद्दालाई सम्बोधन गर्न सकेनौं भने दुवै देशमा पानीको अभाव हुनेबारे पनि बताएँ । मैले संवादमाफर्त हामी मिलेरै कश्मीरको विवाद समाधान गर्न सक्छौँ भने ।’

आफ्नो वार्ताको प्रयासलाई भारतले गरेको बेवास्ताप्रति निराशा व्यक्त गर्दै भारतले आफू महाशक्तिजस्तो व्यवहार गर्दै आफुहरुमाथि हैकम चलाउन खोजेको समेत खानले बताए ।