Hamro Khabar

एसिया कपमा आज भारत र श्रीलंका भिड्दैँ

आइतबार, भाद्र ३१ २०८०

एसिया कपमा आज भारत र श्रीलंका भिड्दै छ ।

काठमाण्डौं । एसिया कपमा आज भारत र श्रीलंका भिड्दै छ ।
खेल नेपाली समयअनुसार अपराह्न सवा ३ बजे श्रीलंकाको कोलम्बोस्थित आर प्रेमदासा अन्तर्राष्ट्रिय क्रिकेट स्टेडियममा हुँदैछ ।
सुपर फोरमा पाकिस्तान र बंगलादेशलाई हराउँदै श्रीलंका फाइनल पुगेको थियो। सुपर फोरमा भारतसँग भने श्रीलंका ४१ रनले पराजित भएको थियो।
सुपर फोरको तीन खेलमध्ये भारत दुई खेलमा विजयी भएको थियो। पाकिस्तान र श्रीलंकमाथि विजयी भएर बंगलादेशसँग पराजित भएपनि भारत सुपर फोरको शीर्षस्थान कायम गर्दै फाइनल पुगेको हो। फाइनलकै निम्ति भारतले विराट कोहली, हार्दिक पाण्ड्या, जसप्रित बुमराह, मोहम्मद शिराज लगायतका खेलाडीलाई बंगलादेशविरूद्ध खेलमा आराम दिएको थियो।
१९८४ देखि सुरू भएको एसिया कपको १५ औं संस्करणसम्म आइपुग्दा भारतले सर्वाधिक ७ पटक उपाधि जितेको छ भने ३ पटक उपविजेता बनेको छ। श्रीलंकाले ६ पटक उपाधि जित्दा ६ पटक उपविजेता बनेको छ।
एकदिवसीय अन्तर्राष्ट्रियमा भारत र श्रीलंका १६६ पटक आमनेसामने भएका छन्। जसमध्ये भारतले ९७ र श्रीलंकाले ५७ खेल जितेको छ।