Hamro Khabar

आणविक सम्झौता जोगाउन वार्ता गर्ने फ्रान्स र इरानबीच सहमति

आइतबार, आषाढ २२ २०७६

एजेन्सी । विश्व शक्ति राष्ट्र र तेहेरानबीचको आणविक सम्झौता जोगाउन फ्रान्स र इरानबीच फेरि वार्ता सुरु गर्ने सहमति भएको छ । फ्रान्सका राष्ट्रपति इम्यानुएल म्याक्रोन र इरानी समकक्षी हसन रुहानीबीच वार्तालाई अघि बढाउने विषयमा सहमति जुटेको हो ।

दुई नेताबीचको टेलिफोन कुराकानीमा रुहानीले सम्झौता बचाउन युरोपेली मुलुकलाई तत्काल कदम चाल्न आग्रह समेत गरेका छन् । राष्ट्रपति म्याक्रोनले भने सम्झौताका सरोकारवाला पक्षसँग छलफल गरेर निस्कर्षमा पुग्न प्रयास गर्ने आश्वासन दिएका छन् ।

अमेरिका भने सन २०१५ को सो सम्झौताबाट अलग भइसकेको छ । साथै युरोपेली मुलुकलाई पनि सम्झौता तोडन दबाव दिदै आएको छ । इरानले अमेरिकी जासुसी ड्रोन विमान खसालेपछि दुई मुलुकबीचको सम्बन्ध अहिले थप तनावपूर्ण बनिरहेको अवस्थामा तेहेरानले भने युरोपेली मुलुकको समर्थन खोजिरहेको छ ।