एजेन्सी। अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच आइतबार भेट वार्ता हुने भएको छ । 

उत्तर र दक्षिण कोरियाको  सैनिकरहित  सीमा क्षेत्रमा भेटवार्ता हुन लागेको बीबीसीले जनाएको छ ।

जापानको ओसाकामा शनिबार सकिएको जी (२० राष्ट्रहरूको शिखर सम्मेलनका सकेर राष्ट्रपति ट्रम्प  सउल आएका थिए । सउलमा उनले द्वीपक्षीय सम्बन्धबारे समकक्षी इनसँग भेटवार्ता गरेका थिए ।

राष्ट्रपति ट्रम्प र दक्षिण कोरियाली समकक्षी मुन जाइ इन उत्तर कोरियाली सीमातर्फ हिँडिसकेको अन्तराष्ट्रिय सञ्चारमाध्यमले जनाएका छन् ।

भेटपछि आयोजित संयुक्त पत्रकार सम्मेलनमा इनले उत्तर कोरियाली नेतासँग सीमामा वार्ता हुन लागेको जानकारी दिएका हुन् ।
 उनले यो सैनिकरहित क्षेत्रमा ट्म्प र किमले हात मिलाउनु ऐतिहासिक घटना हुने बताए । भेटले  ट्रम्प(किम तेस्रो सम्मेलन कहिले हुने भन्ने पनि तय गर्ने इनले बताए ।  

ट्रम्प र किमबीच गत फेब्रुअरीमा भियतनामको हनोईमा भएको दोस्रो शिखर वार्ता असफल भएपछि कोरियाली प्रायद्वीपको अनआणविकीकरणको प्रक्रिया अनिश्चित भएको थियो ।

पछिल्लो समय ट्रम्प र उनको सम्बन्ध सुधार हुँदै गएको छ ।अघिल्लो सातामात्र ट्रम्पले  उनलाई चिठी पठाएका थिए, उनले चिठी निकै महत्वपूर्ण भएको बताएका छन् ।

ट्रम्पको दक्षिण कोरिया भ्रमणले उत्तर कोरियासँगको वार्ता सुचारू गराउन आधार निर्माण गर्ने अमेरिकी विदेश मन्त्री माइक पोम्पेओले विश्वास व्यक्त गरेका छन् ।