उम्मेदवार सिफारिसमा राजनितिक दलहरु इमान्दार र नैतिकवान् भने देखिएनन् । जघन्य अपराध, भ्रष्टाचार र गुण्डागर्दीमा लागेकाहरुलाई धमाधम उम्मेदवारमा सिफारिस गरिँदै छ ।
काठमाडौं आगामी मंसिर ४ गते देशभर संघीय संसद्को चुनाव छ । यसको लागि चहलपहल व्यापक पनि छ । अहिले धमाधम उम्मेदवार सिफारिस चलिरहेकोले चुनावी माहोल तातेको देखिन्छ । प्रतिनिधि सभा तर्फ १६५ र प्रदेश सभातर्फ ३३० पदमा मंसिर ४ गते निर्वाचन हुँदै छ ।
चुनावमा सिफारिस र टिकट पाउन शक्तिकेन्द्र धाउनेको लाइन पनि लामै छ । राजनितिक दलहरुले निर्वाचन समिति नै बनाएर उम्मेदवारको सिफारिस गरिरहेका छन् । खासगरी ठुला तथा बरिष्ठ नेताहरुलाई पद सुरक्षित राख्न सहज जित गराउने तर्फ सबैको ध्यनाकर्षण भइरहेको छ ।
अहिलेको परिस्थितिमा सत्तामा रहेका गठबन्धनले कसरी शक्ति सन्तुलन गरेर सबै दलको मन राख्ने गरी सिटको बाँडफाँट गर्छ त्यो हेर्न बाँकी छ । सिटको टुंगो लगाउन बनेको कार्यदलको भूमिका प्रभावकारी नहुदाँ गठबन्धनकै शिर्ष नेताहरु सहमति खोज्न लागि परेका छन् र दैनिक भेटघाट र बैठकबाट पनि अझै सिट टुंगो लगाउन सकिएको छैन । उता एकल चुनावी मैदानमा जाने तयारी गरेको नेकपा एमालेले पनि साना दलहरुसँग वार्ता र संबाद भने कायम राखेको छ ।
सिटको विवाद नरहेपनि एमालेले सबै जिल्लामा उम्मेदवारको सिफारिस गर्न सकेको छैन । गठबन्धनले पनि सिटलाई मिलाउने प्रयासमा बैठक गरिरहेको छ । तर सबै दलले आ आफ्नो तर्फबाट उम्मेदवारको सिफारिस भने गरिरहेका छन् ।
तर उम्मेदवार सिफारिसमा राजनितिक दलहरु इमान्दार र नैतिकवान् भने देखिएनन् । जघन्य अपराध, भ्रष्टाचार र गुण्डागर्दीमा लागेकाहरुलाई धमाधम उम्मेदवारमा सिफारिस गरिँदै छ । नेपाली कांग्रेसले जिउँदै मानिसलाई इट्टा भट्टामा हालेर मारेको जघन्य अपराधमा मुछिएका नेता मोहम्मद अफताब आलमलाई रौतहट क्षेत्र नम्बर २ बाट एकल सिफारिस गरेको छ । एकल सिफारिस परेकोले उनले टिकट पाउने पक्का छ । आलम यसअघि पनि रौतहट क्षेत्र नम्बर २ बाटै प्रतिनिधिसभा सदस्य निर्वाचित भएका थिए। उनी बम विस्फोटमा संलग्न रहेको र घाइतेलाई जिउँदै इँटाभट्टामा हालेको आरोपमा पक्राउ परेपछि उनको सांसद पद निलम्बनमा छ।
त्यस्तै कांग्रेसले नै भ्रष्टाचार मुद्दा खेपिरहेका विजयकुमार गच्छदारलाई पनि एकल उम्मेदवार सिफारिस गरेको छ। सुनसरी क्षेत्र नम्बर ३ बाट सवंसम्मत बनेका उनले पनि टिकट पाउने पक्का छ । बालुवाटारस्थित ललिता निवासको जग्गा व्यक्तिको नाममा गरेको आरोपमा अख्तियार दुरुपयोग अनुसन्धान आयोगले गच्छदारलगायत व्यक्तिविरुद्ध विशेष अदालतमा मुद्दा दायर गरेको थियो।
कांग्रेसबाटै अर्का विवादास्पद छवि भएका गणेश लामा पनि उम्मेदवारमा सिफारिस भएका छन् । लामा काभ्रे क्षेत्र नम्बर १ (ख) बाट प्रदेशसभा उम्मेदवार सिफारिस भएका छन्। गुण्डागर्दी हुँदै राजनितिमा आएका उनीविरुद्ध सम्पत्ति शुद्धीकरणको मुद्दा चलिरहेको छ। त्यस्तै कांग्रेसले नै सिन्धुपाल्चोक क्षेत्र २ बाट अर्का गुण्डा नाइके राजु गोर्खालीलाई उम्मेदवारमा सिफारिस गरेको छ । गोर्खालीसँगै पूर्व राज्यमन्त्री विष्णुविक्रम थापा, कांग्रेस निवर्तमान उपसभापति शिव सुनार, सचिव सबलबहादुर तामाङ र शंकर लामाको नाम पनि सिफारिस गरेको छ ।
यस्तै विवादास्पद उम्मेदवार सिफारिस गर्नेमा एमाले पनि अछुतो छैन । एमालेले गोरखा क्षेत्र नम्बर २ बाट प्रतिनिधिसभा उम्मेदवारमा मिलन गुरुङ (चक्रे मिलन)सहितको नाम सिफारिस गरेको छ। चक्रे मिल पनि गुन्डागर्दी गरी अकुत सम्पत्ति कमाएको आरोपमा पटक–पटक जेल परेका व्यक्ति हुन्।
कानुनअनुसार मुद्दाको छिनोफानो नहुँदासम्म कोही पनि उम्मेदवार हुन मिल्दैन। तापनि, पार्टीको क्षेत्रीय समिति उनीहरुलाई उम्मेदवार बनाउन लागेको छ। दलले पहिलो कदमको रुपमा उम्मेदवार सिफारिसमै नैतिकता देखाउनु पर्ने हो तर नेपालको राजनितिक दलमा इमान्दारीता खोज्नु उजाँड मरुभूमीमा पानी जस्तै हो, भेट्याउन गाह्रै छ । तर सिफारिस गरेपनि अब टिकट बाड्ने बेलमा ध्यान पुर्याओस् ।
अपराधिक पृष्ठभूमि भएकाहरुलाई नैतिक धरातल नै बिर्सिएर लाजै नमानी जनप्रतिनिधि बनाउन राजनितिक दल नै अग्रसर हुनुले चुनाव अझै खर्चिलो हुँद्यै गएको भान हुन्छ। एक क्षेत्रमा चुनाव लड्न ४/५ करोड खर्च हुने कुरो त सांसद् आफैँले भन्दै आएका छन् । साधारण सोझो नीति बोक्ने नेताले चुनाव जित्न नसक्ने अवस्था आएकोले पनि टेडोमेडो बाटो हिँडेका र साम दाम दण्ड भेद गर्न सक्नेलाई उम्मेदवार बनाउन राजनितिक दल लागि परेका देखिन्छ । यति मात्र होइन कुनै दिन राजनितिक दललाई गरेको गुणको मुल्य चुकाएको पनि हुन सक्छ । तर यस्ता नैतिकता समेत नरहेका नेतालाई उम्मेदवार बनाएर जनतामाझ लैजाँदा उनीहरुले के भन्लान् भन्ने हेक्का राजनितिक दललाई हुनु पर्छ । राजनितिमा लागेका सबै बेइमान वा नैतिकता सकिएका हुन्छन् भन्ने छैन। इमान्दार भएर राजनिति गर्नेहरुको कमी छैन्। अबको चुनावमा तिनिहरुलाई टिकट दिए राजनितिक दलहरुले जनताको मन फेरि एकपटक जित्न सक्ने छन् ।