एजेन्सी । अमेरिकाको टेक्ससस्थित सिमाना नजिकको एउटा बन्दी केन्द्रबाट झन्डै २५० आप्रवासी बालबालिकाहरूलाई अन्यत्र सारिएको छ ।

कानुन व्यवसायीहरूद्धारा गरिएको अनुगमनको क्रममा बालबालिकाहरूलाई निकै कम ध्यान दिइएको पाइएपछि उनिहरुलाई अन्यत्र सारिएको हो । त्यहाँ पुगेका कानुन व्यवसायीहरूले बन्दीगृहमा खाना र औषधी अभाव लगायत त्यहाँको कमजोर एवम् भद्रगोल अवस्थाबारे बोलेका थिए ।

अनुगमनमा गएका एक कानुन व्यवसायीले बीबीसीलाई बताए अनुसार बालबालिकाहरू यसरी थुनिएका थिए, जहाँ कोठाको बिचमा खुला शौचालय थियो। उनीहरू त्यहीं खाने(सुत्ने गर्थे । अनुगमन टोलीमा रहेका विलिमेट युनिभर्सिटीका प्राध्यापक वारेन विनफोर्ड भन्छन्, ‘त्यहाँ ती बालबालिकाको ख्याल गर्ने कोही थिएनन् । पहिले भण्डारण गृह रहेको ठाउँमा सयौं बालबालिकाहरू राखिएका थिए। ति भिडभाडयुक्त मात्र थिएनन्, त्यहाँ जुम्राको प्रकोप पनि थियो ।’

अमेरिकी सीमा काट्ने धेरैजसो मध्य अमेरिकी अभिभावकहरूलाई सन् २०१८ मा उनीहरूका बालबालिकाबाट छुट्ट्याइएको थियो । आप्रवासी सम्बन्धी राष्ट्रपति डोनल्ड ट्रम्पको शून्य सहनशीलता नीतिका कारण त्यतिखेर झन्डै तीन हजार बालबालिकाहरू अभिभावकबाट अलग्याइएका थिए।

ती क्षेत्र आसपास बस्ने मानिसहरूले समेत बालबालिकाको त्यस्तो दयनीय अवस्था देख्दादेख्दै सहयोग गर्न नपाउनुलाई ’हृदयविदारक अवस्था’ भनेका छन् । सीमा अधिकारीहरूले एक वक्तव्यमार्फत् ती गृहहरू तोकिएको कामका लागि उपयुक्त नभएको स्वीकार गरेका छन् । तर उनीहरूले आर्थिक स्रोत कमजोर भएकाले त्यस्तो अवस्था आएको तर्क गरेका छन् ।

त्यस्तो नाजुक अवस्थामा बालबालिकाहरूलाई त्यहाँ थुप्रै साता राखिएको थियो । त्यस्ता बन्दीगृहमा गत वर्ष यता छजना बालबालिकाले ज्यान गुमाएका छन् ।

यसैसँगै आप्रवासी बालबालिकाहरू राखिने केही बन्दी गृहहरूको अवस्थाका कारण खडा भएको आलोचनात्मक अवस्थाबीच अमेरिकी भन्सार तथा सीमा सुरक्षा निकायका प्रमुखले पदबाट राजीनामा दिएका छन् ।