बुधवार एकैदिन देशभर थप ११ हजार ३ सय ५२ जनामा कोरोनाभाइरसको सङ्क्रमण पुष्टि भएको हो ।
काठमाडौं । राजधानी काठमाडौं उपत्यकासहित देशैभरी कोरोनाको संक्रमण भयावह रूपमा अघि बढेको छ ।
बुधवार एकैदिन देशभर थप ११ हजार ३ सय ५२ जनामा कोरोनाभाइरसको सङ्क्रमण पुष्टि भएको हो । २३ हजार ४०९ जनाको कोरोना परीक्षण गर्दा पीसीआर विधिबाट ९ हजार ५०२ जनामा तथा एन्टिजेन विधिबाट १ हजार ८५० जनामा सङ्क्रमण पुष्टि भएको स्वास्थ्य तथा जनसंख्या मन्त्रालयले जनाएको छ । योसँगै देशभर सक्रिय सङ्क्रमितको सङ्ख्या पनि ह्वात्तै बढेर ४७ हजार ९२९ पुगेको छ । पछिल्लो २४ घण्टामा थप ५६२ जना संक्रमित निको भएका छन् । देशभरको अाैसत संक्रमण दर बढेर ५२ प्रतिशत पुगेकाे छ । जुन हालसम्मकै सबैभन्दा बढी हाे ।
कोरोनाका कारण गत २४ घण्टामा थप ४ जनाको मृत्यु भएको छ । हालसम्म देशमा ११ हजार ६२८ जनाले ज्यान गुमाइसकेका छन् । सक्रिय सङ्क्रमितमध्ये १ हजार ४१४ जना विभिन्न अस्पतालमा उपचार गराइरहेका छन् । उनीहरुमध्ये १६९ जनाको आइसीयूमा तथा २८ जनाको भेण्टिलेटरको सहायतामा उपचार भैरहेको छ ।