रौतहट । रौतहटको चन्द्रपुर नगरपालिका १ स्थित मंगलपुर जंगलमा रोकिराखेको यात्रुबाहक बसलाई मालबाहक ट्रकले पछाडिबाट सोमबार राति ठक्कर दिँदा २ जना भारतीय नागरिकको मृत्यु भएको छ ।

दुर्घटनामा २१ जना घाइते भएका छन् । घाइतेमध्ये ३ जनाको अवस्था गम्भीर रहेको प्रहरीले जनाएको छ ।

काठमाडौंबाट जनकपुरतर्फ गईरहेको ना.६ ख. ९०३० भारतीय तिर्थयात्री सवार बस सोमबार राति १२.४५ बजेको समयमा पूर्व पश्चिम राजमागको पौराई जंगलस्थित मंगलपुरमा यात्रुको शौचका लागि रोकेको अवस्थामा सोही दिशातर्फ गइरहेका को. १ ख २६२५ नम्वरको मालबाहक ट्रकले पछाडिबाट ठक्कर दिँदा २ भारतीयको घटनास्थलमै मृत्यु भएको प्रहरीले जनाएको छ ।

उक्त बसमा भारतको उडिसा राज्यका ६० जना तीर्थयात्री सवार थिए। ट्रकले ठक्कर दिँदा उडिसा राज्यको उपरा साही नयरखण्डाला मन्दीर जागामारा भुवनेश्वर खोडदाहाका ५२ वर्षीय विजयकुमार जेना र ५४ वर्षीय चरण विशालको घटनास्थलमै ज्यान गएको रौतहटका डिएसपी नविन कार्कीले जानकारी दिएका छन् । 

२१ जना घाइते तीर्थयात्रीमध्ये गम्भिर घाइते ५५ बर्षका सर्बेश्वर जेना, ५३ बर्षका शेषादेव जेना र ६३ बर्षका करुणा कर्जुनाकोे वीरगञ्जस्थित न्यूरो अस्पतालमा उपचार भइरहेको छ ।

घटनापछि ट्रक चालक फरार भए पनि प्रहरी अनुसन्धानबाट पत्ता लागि सकेको र चाँडै नियन्त्रणमा लिने प्रहरीले बताएको छ । मृतक दुवै जनाको शव चन्द्रनिगाहपुरस्थित सरकारी अस्पतालमा राखिएको छ ।