Hamro Khabar

कांग्रेस महाधिवेशनः सभापतिमा निधिको उम्मेद्वारी घोषणा

हाम्रोखबर बिहीबार, मङ्सिर ९ २०७८

नेपाली काँग्रेसका उपसभापति विमलेन्द्र निधिले पार्टीको आसन्न १४ औँ महाधिवेशनमा सभापतिमा उम्मेद्वारी दिने घोषणा गरेका छन् ।

बिहीबार काठमाडौँको नयाँ बानेश्वरस्थित आफ्नो सम्पर्क कार्यालयमा निधिले औपचारिक रूपमा सभापति पदमा लड्ने घोषणा गरेका हुन् । आफ्नो उम्मेद्वारीको औचित्य पुष्टि गर्दै उनले भने–“लोकतन्त्र प्राप्तिका लागि विगतका संघर्षपूर्ण कठिन दिनमा अनेक सहकर्मीहरूसँगै मैले जेलनेलको लामो शृङ्खला अनुभव गरेको छु । विगतको पृष्ठभूमि र नेतृत्वदायी अनुभवको यस चरणमा मैले नेपाली काँग्रेसको केन्द्रीय सभापति पदमा आफूलाई प्रस्तुत गरेको छु ।”

उनले आफू सभापतिमा विजयी भए वैचारिक रूपमा स्पष्ट, गतिशील र जनतासँग जोडिने काँग्रेस बनाउने नारा दिएका छन् । पार्टीलाई संघीय लोकतान्त्रिक गणतन्त्र सुदृढ र सार्थक बनाउने नेतृत्वदायी शक्ति बनाउने निधिको सङ्कल्प छ । उम्मेदवारी घोषणासंगै निधिले आफ्ना परिकल्पनाका आधारमा भावी कार्ययोजना र पार्टीभित्र सुधार गर्नुपर्ने विषयहरु समेटेर घोषणापत्र समेत सार्वजनिक गरेका छन् ।

काँग्रेसमा सभापतिका लागि शेरबहादुर देउवा, रामचन्द्र पौडेल, शशांक कोइराला, प्रकाशमान सिंह,शेखर कोइराला, कल्याण गुरुङ लगायतका नेताहरुले दाबी गर्दै आएका छन् । तीमध्ये गुरुङ र निधिले मात्र औपचारिक घोषणा गरेका छन् ।