मुख्य प्रशिक्षक बाल गोपाल महर्जनले आफूहरु एएफसी यू–२३ एसियन कप छनोटमा राम्रो नतिजा निकाल्ने विश्वास ब्यक्त गरेका छन् ।
२३ वर्षमुनिको नेपाली राष्ट्रिय फुटबल टोलिका मुख्य प्रशिक्षक बाल गोपाल महर्जनले आफूहरु एएफसी यू–२३ एसियन कप छनोटमा राम्रो नतिजा निकाल्ने विश्वास ब्यक्त गरेका छन् ।
आइतबार ताजिकिस्तानमा प्रि–म्याच कन्फरेन्समा बोल्दै मुख्य प्रशिक्षक महर्जनले राम्रो नतिजाका लागि नेपाली टोलि तयार रहेको प्रतिक्रिया दिए । तीनवटै विपक्षी टिम राम्रो भएपनि आफुहरुले राम्रो नतिजाका लागि सक्दो प्रयास गर्ने उनको भनाइ थियो । प्रशिक्षक महर्जनले अधिकांश खेलाडीहरू साफ च्याम्पियनसिपको लागि राष्ट्रिय टोलीमा रहेकाले एएफसीको तयारी पर्याप्त हुन नपाएको धारणा राखे । राष्ट्रिय टोलिका मुख्य प्रशिक्षक अब्दुल्लाह अल मुताईरीले युवा खेलाडीलाई प्राथमिकता दिएका कारण साफको अनुभव लिएका धेरै खेलाडी एएफसी छनोट खेल्दैछन् ।
नेपालले समूह चरणको पहिलो खेलमा भोलि सोमबार इरानसँग प्रतिस्पर्धा गर्न छ । समूह ’बी’ मा नेपाल र इरानसंगै ताजिकिस्तान र लेबनान रहेका छन् । नेपालले अक्टोबर २८ मा ताजिकिस्तानसँग तथा अक्टोबर ३१ मा लेबनानसँग खेल्नेछ ।
समूहको शीर्ष टोली र दोस्रो टोली मध्ये उत्कृष्ट चार टोली पनि उज्वेकिस्तानमा २०२२ जुनमा हुने यू–२३ एसियन कपमा छनोट हुनेछन् ।