Hamro Khabar

एमसीसीबारे सभामुख सापकोटाको जवाफ–‘दबाबमा निर्णय गर्दिन’

हाम्रोखबर आइतबार, बैशाख ५ २०७८

काठमाडौं । सभामुख अग्निप्रसाद सापकोटाले सदनमा एमसीसी टेबल नगर्ने संकेत गरेका छन् । आइतबार नेपाल पत्रकार महासंघको पद हस्तान्तरण कार्यक्रमलाई सम्बोधन गर्दै उनले यस्तो संकेत गरेका हुन् ।
प्रधानमन्त्री केपी शर्मा ओलीले सभामुखले सदनमा एमसीसी टेबल गर्न नदिएको भन्दै आक्रोस पोखिरहेको बेला सभामुख सापकोटाले कसैको दबाबमा कुनै पनि निर्णय नगर्ने बताए । यद्यपि उनले एमसीसीको उच्चारण भने गरेनन् ।
आफ्नो जिम्मेवारी र भूमिका स्वतन्त्र रहेको र आफूले सभामुखको रुपमा संविधानको अधिनमा रही स्वतन्त्र काम गर्ने सपथ खाएको स्मरण गर्दै सभामुख सापकोटाले भने– ‘म कसैको दबाबमा निर्णय गर्ने छैन । म जस्तोसुकै जोखिम लिन तयार छु । तर, दबाबमा निर्णय हुँदै । संविधान र कानूनको आधारमा मेरा निर्णयहरु हुनेछन् ।’
सभामुख सापकोटाले प्रतिनिधिसभा निक्कै ठूलो घेराबन्दीमा रहेको समेत बताए । कुनै न कुनै रुपमा संघीय संसद प्रतिनिधिसभामा दबाब सृजना गरेर आफू अनुकूल निर्णय गराउन घेराबन्दी गरिएको सभामुखको संकेत थियो ।