काठमाडौं । प्रमुख प्रतिपक्ष नेपाली कांग्रेस लगायत अन्य प्रतिपक्ष दलका सांसदहरुले सरकारको नीति तथा कार्यक्रम छरपष्ट र अमूर्त रहेको बताएका छन । प्रतिनिधिसभाको सोमबारको बैठकमा बोल्दै उनीहरुले जनताको सरकारलाई मेरो सरकार भन्न लगाएर राष्ट्रपतिलाई विवादमा ल्याउने र गणतन्त्रको उपहास गरेको आरोप पनि लगाए ।
 पूर्वअर्थमन्त्री समेत रहेका कांग्रेस सांसद ज्ञानेन्द्रबहादुर कार्कीले सरकारको नीति तथा कार्यक्रम महत्वकाँक्षी, छरपष्ट, अमूर्त, प्रोपगाण्डमा आधारित भएर आएको बताए । जनताको सरकारलाई ‘मेरो सरकार’ भन्न लगाएर राष्ट्रपतिलाई विवादमा ल्याउने र गणतन्त्रको उपहास गर्ने काम भएको उल्लेख गर्दै उनले भने,‘सरकारका कामकारवाहीबाट आर्थिक र प्रशासनिक क्षमतामा ह्रास आएको छ,  यसले समृद्धिको दिसातर्फ होइन, अलमलको दिशातर्फ उन्मुख गराउँछ ।”
राष्ट्रिय जनता पार्टी नेपालका अध्यक्ष मण्डलका सदस्य महन्थ ठाकुरले परम्परागत शैलीमै प्रस्तुत भएको नीति तथा कार्यक्रममा मधेसी जनताका लागि केही नभएको बताए । उनले भने, ‘राज्य पहिलेको भन्दा अझ बढी निरङ्कुश भएको छ, अहिले सारा अधिकार सिंहदरबार केन्द्रित गर्ने काम भएको छ, मधेसी समुदायका लागि अहिले झ्याल र ढोका दुवै बन्दछ ।’
 न्याय र अधिकार माग्दा गोली खानुपर्ने, यो कस्तो लोकतन्त्र हो भनी प्रश्न गर्दै सांसदले ठाकुरले भने, ‘भन्नका लागि गणतन्त्र र सङ्घीयता छ तर प्रदेशले अधिकार पाएको छैन, आमजनतामा परिवर्तन भएको महसुस हुन सकेको छैन, कुनै निकायमा समानता देखिएको छैन, विभेद यथावत छ ।’ 
सङ्घीय समाजवादी फोरम नेपालका नेता विमलप्रसाद श्रीवास्तवले सरकारको नीति तथा कार्यक्रममा मुलुकका सबै क्षेत्रलाई समेट्न नसकेको आरोप लगाए । उनले भने,‘झारा टार्ने किसिमबाट घोषणा भएका कार्यक्रमले मजदूर र किसानका समस्या समाधान हुन सक्दैन, तत्काल चिया बगानका मजदूरको समस्या समाधान गर्न पहल होस्, सुरक्षा निकाय र कर्मचारीको विषय पनि गोलमोटल रुपमा आएको छ ।’