काठमाडौं । यतिबेला देशका मुख्य शहरहरूमा हिन्दु राज्य र राज संस्थाको पक्षमा नारा लागिरहेको छ । २०६२/६३ सालको जनआन्दोलनको झल्को दिनेगरी सडकमा राजाको पक्षमा जनसागर उर्लिरहेको छ ।

हाम्रो राजा हाम्रो देश प्राणभन्दा प्यारो छ, राजा आऊ देश बचाऊ, हिन्दू राज्य कायमगरलगायतका नारा लगाएर जनता आन्दोलिन बनिरहेका छन् । राजतन्त्रको विधिवत अन्त्य भएको १२ वर्षपछि जनताले फेरी पुरानै सत्ताको पक्षमा नारा लगाउनुलाई अर्थपूर्ण रुपमा हेर्न सकिन्छ ।

नेपालमा जनताले प्रत्येक दश वर्षमा परिवर्तनका लागि सडक तताउने गरेको इतिहास छ । वर्तमान शासनसत्ताले जनतामा वितिष्णा बाहेक अरु कुनै काम गर्न नसकेको भन्दै जनता रुष्ट छन् ।

देशमा भ्रष्टार मौलाउँदो छ । नेपाल एसियामै प्रष्टाचार हुने मुलुकको पहिलो सूचिमा छ । यही बिचमा सोमबार काठमाडौंमा पनि राजतन्त्रको माग गर्दै प्रदर्शन भयो ।

राष्ट्रिय प्रजातन्त्र पार्टी राप्रपाका वरिष्ठ नेता एवं पूर्व मन्त्री बुद्धिमान तामाङ यसलाई जनताको मागको रुपमा बुझ्छन् । उनी गणतन्त्र असफल भइसकेकाले राजा र हिन्दू राज्य जनताको माग भएको ठान्छन् ।

'अहिले जनता स्वस्फूर्त रुपमा सडकमा आएर राजा र हिन्दू राज्यको पक्षमा नारा लगाइरहेका छन् । सुरुमै पनि जनताले राजा र हिन्दू राज्यको विरोध गरेका थिएनन् । जनताले निरंकुस राजा नभइ संवैधानिक राजसंस्था चाहिने कुरा गरेका थिए', उनले भने, 'तर नेताहरूले गलत व्याख्या गरेर जनतालाई गुम्राहमा राखेर राजा हटाए र हिन्दू राज्य हटाइयो । अहिले नेताहरूले काम गर्न नसकेपछि जनता सचेत बने र फेरी राजा र हिन्दू राज्यको पक्षमा सडकमा आउँदैछन् ।'

उनी नेपालका लागि संघीयता आवश्यक नभएको ठान्छन् । देशले स‌ंघीयता धान्न नसक्ने नेता तामाङले बताए । हाम्रो खबरसँगको कुराकानीमा उनले नेताहरू भ्रष्ट बन्दै गएको र जनताको उनीहरूप्रतिको विश्वास गुम्दै गएको बताए ।

संविधान सभाको पहिलो बैठकले २०६४ मा राजतन्त्रको अन्त्यको घोषणा गर्दै विधिवतरुपमा संघीय लोकतान्त्रिक गणतन्त्रको स्थापना भएको घोषणा गरेको थियो ।

कतै राप्रपा समर्थकहरूले प्रदर्शन गरिरहेका छन् त कतै राजावादी संस्थाहरूले स्वस्फूर्त रुपमा आन्दोलन गरिरहेका छन् ।

सोमबार राष्ट्रिय शक्ति नेपालको उपत्यका आन्दोलन परिचालन समितिले माइतीघरदेखि नयाँ बानेश्वरसम्म प्रदर्शन गर्यो । यस अगाडि विभिन्न संस्थाहरूले बुटवल, पोखरा, जनकपुर, नेपालगञ्चमा, धनगढी र विराटनगरमा प्रदर्शन गरेका छन् । २० गते झापामा प्रदर्शन हुँदै छ ।