Hamro Khabar

'डा. केसीको अवस्था गम्भीर, मांशपेशी बाउँडिन थाले'

बिहीबार, आश्वीन १५ २०७७

चिकित्सा शिक्षा सुधारको माग राख्दै १९औं सत्याग्रह थालेका डाक्टर गोविन्द केसीको अवस्था जोखिमपूर्ण बन्दै गएको त्रिवि शिक्षण अस्पताल महाराजगन्जले जनाएको छ ।

काठमाडौं । चिकित्सा शिक्षा सुधारको माग राख्दै १९औं सत्याग्रह थालेका डाक्टर गोविन्द केसीको अवस्था जोखिमपूर्ण बन्दै गएको त्रिवि शिक्षण अस्पताल महाराजगन्जले जनाएको छ ।

१७ दिनदेखि अनसनरत डा. गोविन्द केसीको स्वास्थ्यअवस्था गम्भीर बन्दै गएको अस्पताको भनाइ छ ।

त्रिवि शिक्षण अस्पतलाका अनुसार डा. केसीको रगतमा चिनीको मात्रा र सिरम इलेक्ट्रोलाइट्स निकै कम भइसकेकाले उनको जीवन नै खतरामा परेको छ ।

अस्पतालले जारी गरेको विज्ञप्तिमा डा. केसीमा कुनै पनि बेला मुटु र स्नायुसम्बन्धी समस्या आउनसक्ने र त्यसो भएमा ज्यानकै जोखिम हुने उल्लेख छ । अस्पतालका अनुसार उनको रगतमा ह्वाइट ब्लड सेल्सको मात्रा निकै न्यून हुँदा संक्रमणको ठूलो जोखिम छ ।

अस्पतालले डा. केसीलाई बारम्बार चक्कर आउने, मुटुको धड्कन बढेको, छाती दुख्ने, जिउ गल्ने, शरीरका मांशपेशी दुख्ने/बाउँडिने लगायतका समस्या देखिएको जनाएको छ ।

डा. केसीलाई आइसीयूमा राखी निगरानी र उपचार व्यवस्था गर्नुपर्ने अवस्था भए पनि उनले सामान्य सलाइन लिन बाहेक अरु केही पनि नमानेको विज्ञप्तिमा उल्लेख छ ।