विश्वभर कोभिड–१९ बाट विश्वभर एक करोड २८ लाखभन्दा बढी सङ्क्रमित भएका र पाँच लाख ६७ हजारभन्दा बढीको मृत्यु भएको वल्डोमिटरर्सले जनाएको छ ।
एजेन्सी । विश्वभर कोभिड–१९ बाट विश्वभर एक करोड २८ लाखभन्दा बढी सङ्क्रमित भएका र पाँच लाख ६७ हजारभन्दा बढीको मृत्यु भएको वल्डोमिटरर्सले जनाएको छ । आइतबार बिहानसम्मको तथ्यांक अनुसार विश्वभर ७४ लाख ७८ हजार कोरोना भाइरस सङ्क्रमित निको भई घर फर्किसकेका छन् भने ४७ लाख व्यक्ति अझै पनि सङ्क्रमित रहेका छन् ।
पछिल्लो २४ घन्टामा विश्वमा २ लाख १४ हजार व्यक्ति कोरोना सक्रमित भएका छन् भने करिब ५ हजारको मृत्यु भएको छ ।
विश्वमै सवैभन्दा धेरै सङ्क्रमित रहेको अमेरिकामा विगत २४ घण्टामा कोरोनाभाइरसबाट सङ्क्रमितको सङ्ख्या अहिलेसम्मकै धेरै ६१ हजार ७१९ पुगेको वल्डोमिटरर्सले जनाएको छ ।
योसँगै अमेरिकामा सङ्क्रमितको सङ्ख्या ३३ लाख ५५ हजार पुगेको छ । त्यस्तै विगत २४ घण्टामा अमेरिकामा कोभिड–१९ सङ्क्रमित ७३२ जनाको मृत्यु भएको छ । अहिलेसम्म एक लाख ३७ हजार बढीको कोभिड–१९ सङ्क्रमितको मृत्यु भएको अमेरिकी स्वास्थ्य अधिकारीहरूले पुष्टि गरेका छन् ।
त्यसैगरी दोस्रो धेरै सङ्क्रमित रहेको ब्राजिलमा १८ लाख ४० हजार जना सङ्क्रमित भएका छन् भने ब्राजिलमा कोरोनाका कारण ७१ हजार ४९२ जनाको मृत्यु भएको छ ।
सङ्क्रमणका दृष्टिकोणले अमेरिका र ब्राजिलपछि बढी सङ्क्रमित भारतमा भएका छन् । भारतमा आठ लाख ५० हजार व्यक्ति सङ्क्रमित भएकोमा ६२ प्रतिशतभन्दा बढी निको भई घर फर्किएका भारतको स्वास्थ्य मन्त्रालयले जानकारी गराएको छ । भारतमा शनिबारसम्ममा २२ हजार ६८७ जनाको मृत्यु भएको छ ।