जिल्लाको ढोरपाटन नगरपालिका वडा नम्बर ४ खुङ्गास्थित छोरेगाउँ माविको क्वारेन्टाइनमा बसेका एक युवकको मृत्यु भएको छ ।
बागलुङ । जिल्लाको ढोरपाटन नगरपालिका वडा नम्बर ४ खुङ्गास्थित छोरेगाउँ माविको क्वारेन्टाइनमा बसेका एक युवकको मृत्यु भएको छ ।
गत असार १ गते परिवारका सदस्यसहित भारतबाट आएर सो क्वारेन्टाईनमा बस्दै आएका निसीखोला गाउँपालिका–२ का २९ वर्षीय सुनिल विकको मृत्यु भएको बुर्तिबाङ प्राथमिक स्वास्थ्य केन्द्र जनाएको छ ।
क्षयरोग र किड्नी सम्बन्धि रोगबाट ग्रसित विकको आइतबार बिहान मृत्यु भएको केन्द्रका प्रमुख डा.मिलन मल्लले जानकारी दिए ।
विकको स्थायी घर निसीखोला गाउँपालिका भए पनि ससुराली ढोरपाटनमा भएकाले त्यही नजिकको क्वारेन्टिनमा बसेका थिए ।
लामो समयदेखि भारतमा बस्दै आएका विक २० दिनदेखि श्रीमति सहित तीन छोराछोरीको साथमा क्वारेन्टिनमा रहेका थिए । अन्यको पीसीआर रिपोर्ट नेगेटिभ आएको भएपनि मृतक विकको पीसीआर रिपोर्ट अहिलेसम्म आएको छैन ।
रिपोर्ट नआएका कारण अन्त्येष्टि कसरी गर्ने भन्ने अन्यौल देखिएको छ । रिपोर्ट आएपछि सोही अनुसार उनको दाहसंस्कार गरिने डा.मल्लले बताए ।