काला जातीका एकजना मानिसलाई प्रहरीले घाँटी थिचेर मारेको घटनालाई लिएर सुरु भएको आन्दोलन अमेरिकाभर फैलिएको छ ।
एजेन्सी । काला जातीका एकजना मानिसलाई प्रहरीले घाँटी थिचेर मारेको घटनालाई लिएर सुरु भएको आन्दोलन अमेरिकाभर फैलिएको छ ।
प्रहरी र प्रदर्शनकारीहरूबीच हिंसात्मक झडप नरोकिएपछि अमेरिकाका विभिन्न सहरमा निषेधाज्ञा जारी गरिएको छ ।
देशभरि आयोजित विरोध प्रदर्शन नियन्त्रण गर्न दङ्गा प्रहरीलाई खटाइएको छ। प्रहरीको सवारीसाधनमा आगो लगाइएपछि उनीहरूले अश्रुग्यास र रबरका गोली प्रहार गरेका छन्।
घटनाको विरोधमा अमेरिकाका कम्तीमा ३० वटा सहरमा ठूला प्रदर्शनहरू भएका छन भने शिकागोमा प्रदर्शनकारीहरूले दङ्गा प्रहरीमाथि ढुगांमुढा गरेका छन । प्रत्युत्तरमा प्रहरीले अश्रुग्यास प्रहार गर्यो। त्यहाँ शनिवार केही मानिसहरूलाई पक्राउ परेका छन ।
भीडलाई तितरबितर पार्न प्रहरीले दर्जनौं राउन्ड रबर बुलेट र अश्रुग्यास हानेको छ। सार्वजनिक भएको एउटा भिडिओमा प्रहरीको भ्यानले प्रदर्शनकारीलाई ठेल्दै लगेको देखिन्छ।
प्रदर्शनकारीले राष्ट्रपति निवास ह्वाइट हाउस र राष्ट्रपति डोनाल्ड ट्रम्पको स्वामित्वमा रहेको न्युयोर्कस्थित ट्रम्प टावर पनि घेरा हालेका छन्।
राष्ट्रपति डोनल्ड ट्रम्पले भने लुटेरा र अराजकहरूले हिंसा फैलाएको आरोप लगाएका छन्। उनले लुटपाट र अराजक गतिविधि भएको भन्दै त्यसको निन्दा गरेका छन । अहिले घृणाको साटो उपचार र अशान्तिको साटो न्याय आवश्यक भएको उनको भनाई छ।
गत सोमवार मिनीयापलिसमा अफ्रिकी अमेरिकी समुदायका ४६ वर्षीय फ्लोइडलाई प्रहरीले घुडाले घाँटि थिचेर उनको मृत्यु भएपछि आन्दोलन भएको हो ।
यो घटनाको भिडियो सामाजिक सञ्जालमा भाईरल भएको थियो । डेरेक शौभिन नामक ४४ वर्षीय पूर्वप्रहरीलाई हत्याको आरोपमा पक्राउ गरिएको छ। उनी घटनापछि पदमुक्त भएका थिए। उनलाई सोमवार अदालतमा पेस गरिनेछ।