Hamro Khabar

जीप दुर्घटनामा पूर्वसांसदसहित तीनजनाको मृत्यु ( अपडेटसहित)

रासस बिहीबार, चैत्र २८ २०७५

गुल्मी । गुल्मीको मुसिकोट नगरपालिकामा जीप दुर्घटना हुँदा पूर्वसांसद सहित तीनजनाको मृत्यु भएको छ भने चालक सहित ७ जना घाइते भएका छन् । दर्लिङ्गबाट बुटवलतर्फ जाँदै गरेको लु १ ज, १९५७ नम्बरको जीप दुर्घटना हुँदा पूर्वसांसद रुद्रमणी भन्डारी सहित ८ वर्षीय बालक ओस्कार विक र कौशिला थापाको निधन भएको जिल्ला प्रहरी कार्यालय गुल्मीका प्रहरी निरीक्षक रवीन्द्रबहादुर खड्काले जानकारी दिए ।

घाइते थापाको उपचार गराउन लैजाने क्रममा निधन भएको हो । त्यसैगरी अन्य ७ जना घाइतेको वामीस्थित लुम्बिनी वामी हस्पिटलमा उपचार भैरहेको छ । घाइते हुनेमा मालिका गाउँपालिका-२ का एकै परिवारका चारजना घाइते भएका छन् ।

धुर्कोट गाउँपालिका–५ निवासी भण्डारी नेपाली काङ्ग्रेसका तर्फबाट गुल्मी क्षेत्र नं ३ बाट २०४८ मा प्रतिनिधिसभामा निर्वा्चित भएका थिए । पूर्वसांसद भण्डारी बुधबार मालिका गाउँपालिकाअन्तर्गत घमिरमा दलित संघका जिल्ला उपाध्यक्ष टेकबहादुर विश्वकर्माको श्रद्धाञ्जलि कार्यक्रममा आएको थियो । जिप घुम्तीमा मोड्ने क्रममा दुर्घटना हुँदा सडकवाट २०० मिटर तल खसेको प्रहरीले जनाएको छ ।