प्रदेश नं ५ मा हालसम्म ६१ जनाको स्वास्थ्य परीक्षण र तीमध्ये ३६ जनाको स्वाब परीक्षणका लागि पठाइएकामा २३ जनाको रिपोर्ट नेगेटिभ आएको छ ।
वुटवल । प्रदेश नं ५ मा हालसम्म ६१ जनाको स्वास्थ्य परीक्षण र तीमध्ये ३६ जनाको स्वाब परीक्षणका लागि पठाइएकामा २३ जनाको रिपोर्ट नेगेटिभ आएको छ ।
प्रदेश सरकार सामाजिक विकास मन्त्रालय महाशाखा प्रमुख डा उमाशंकर चौधरीले रिपोर्ट नेगेटिभ देखिएपछि उनीहरुलाई घर पठाइएको र अन्य १३ जनालाई विभिन्न अस्पतालका आइसोलेशनमा राखिएको जानकारी दिए ।
चौधरीका अनुसार १३ जनामध्ये केहीको रिपोर्ट आउन बाँकी रहेको र केहीको रिपोर्टको प्रक्रियामा रहेका छन् ।
कोभिड १९ को संक्रमण नियन्त्रणका लागि लकडाउन भएपछि हवाइसेवा बन्द हुँदा बिरामीको स्वाब जाँचका लागि गाडीबाट काठमाडौँ पठाउनुपर्ने भएकाले केही ढिलाइ भएको समेत उनले जानकारी दिए ।
शङ्कास्पदको स्वाब परीक्षणका लागि नमूना संकलन गरिएकामध्ये लुम्बिनी प्रादेशिक अस्पताल बुटवलबाट १७ र भीम अस्पताल भैरहवाबाट एक जनाको पठाइएकामा १६ जनाको नेगेटिभ रिपोर्ट आएको र दुई जनाको परीक्षणको प्रक्रियामा रहेको प्रदेश स्वास्थ्य निर्देशनालयका मेडिकल अधिकृत डा सबु काफ्लेले जानकारी दिए ।
यस्तै प्रदेशअन्तर्गत दाङबाट पाँच जनाको स्वाब नमूना पठाइएकामा सबै रिपोर्ट नेगेटिभ देखिएको छ । बाँकेबाट १३ जनाको नमूना पठाइएकामा सात जनाको नेगेटिभ रिपोर्ट देखिएको र अन्य ६ जनाको रिपोर्ट परिक्षणको प्रक्रियामा रहेको समेत डा काफ्लेले जानकारी दिए ।