एजेन्सी । कोरोना भाइरसका कारण विश्व अर्थतन्त्रलाई मन्दी प्रवेश गर्नबाट रोक्न जी २० देशका प्रमुखहरूले भिडियो सम्मेलनमार्फत ५ ट्रिलियन डलर लगानी गर्ने  निर्णय गरेका छन् । बिहिबार जी २० देशहरूले भिडियो सम्मेलनमार्फत विश्व अर्थतन्त्रलाई मन्दी प्रवेश गर्नबाट रोक्न सो  निर्णय गरेको हो ।

सम्मेलनमा चीनका राष्ट्रपति सी जिनपिंगले चीनका लागि सबैभन्दा कठिन समयमा अन्तर्राष्ट्रिय समुदायले चीनलाई निश्वार्थ सहयोग प्रदान गरेको प्रति कृतज्ञता व्यक्त गरेका छन् । उनले यो मित्रतालाई सँधै सम्झने  पनि बताएका छन् । साथै उनले स्वास्थ्य संकटको आरम्भ भएदेखि नै विश्वव्यापी आर्थिक मन्दीलाई रोक्न कडा कदम चाल्नुपर्ने साथै कोभिड १९ महामारीसँग लड्न कडा अन्तर्रा्ष्ट्रिय सहयोगको आग्रह गरेका छन ।

भिडियो सम्मेलनको अध्यक्षता साउदी अरेबियाले गरेको थियो । सम्मेलनमा संयुक्त राष्ट्र संघ, विश्व बैंक, डब्ल्यूएचओ, विश्व व्यापार संगठन, अन्तराष्ट्रिय मुद्रा कोष र आर्थिक सहयोग तथा विकास संगठनको रूपमा शीर्ष संस्थाहरूले भाग लिएका थिए ।  यस बाहेक क्षेत्रीय संगठनहरु (दक्षिण पूर्व एसियाका देशहरुको संगठन), अफ्रिकी संघ, खाडी सहयोग परिषद र अफ्रिकाको विकासका लागि  प्रतिनिधिहरु पनि यसमा सहभागी थिए ।  

जी २० मा चीन, भारत, अष्ट्रेलिया, अमेरिका, बेलायत, अर्जेन्टिना,  ब्राजिल, क्यानडा, जर्मनी, फ्रान्स, इन्डोनेसिया, इटाली, जापान, मेक्सिको, रूस, साउदी अरब,यूरोपियन यूनियन ,दक्षिण अफ्रीका, दक्षिण कोरिया, टर्की गरी २०  राष्ट्रहरु रहेको छ ।